Tit 2 | BEF | STEP | Kaiya ya'ma mono ka lamana'amofihi komopa'agutiko bona'magihi lu enelepilata bati huto lu epibo.

Titus 2

Mono ka lamana'amofihi komopa'agu ka'a

1 Kaiya ya'ma mono ka lamana'amofihi komopa'agutiko bona'magihi lu enelepilata bati huto lu epibo. 2 Ya huto lu epiletogo bona'i olopa napa'amagi eto hite legeso fulu hite komopa'anitu keheliya ite minete komopa'ani enugufa kaba hite nehinogo mono ka keheli ule'ale nehana'a to enemehi epilana'a to baga'a hiti'namofihi komopa'agu minalana'amofihi koli'a finogo bati hite minalune'mu habe. 3 Anago higo olopa ana'i lu epiletogo enali mono ana'i lolo hite, hapa'ani bati hinogo minalabe. Bai nagami'i nalanamofitoga agoya hu meemilabe. To fato bona'mofihi nasana'mu mege ka lite li muyalo malo mehise asaga hetofana'mu lu enelepite ana'ina lamana'amuko fi lehe tete lu epinogo yuhufa ana'magi enali'ani baha'animagihi yagapana'animagihi komopa'ani enalitoga melete kaba hu bati hite hi epalalabe. 5 To ya hilete olopa ana'magi ya'ma yuhufa ana'magihi enelepilata enali komopa'ani enugufa kaba hite mokolo mehise minete nohi hepa'anilo minete lalameha'anifi ana'ina'ani hiti kaba hite minete, baha'animagihi agoya bati hite hu epinogo bona'i luga'amagi bu gelete Hu'mamofihi kaga'a lite le'mo laba mehilabe.

6 Ana suhi huto neheya kola bona'magihi enegekesa lito lu epitogo enali komopa'ani enugufa kaba hite mino eto hite minalabe. 7 To kaika ya'ma ana'ina lamana'amofihi le'mo eto huto hetofa foya babeyafa'a hulotoka komopaka fana tenogo to yokolo ka meluse minoto lusiga lu epito nobitogo kohe netenogo bu nekegete kemege'i melete bilabe. 8 To mono ka ya'ma le'mo bebe soto lu epitogo yamofihi keheli mehe'mise mono kumu luba ka li limilata nehana enali lali kumu ka sibina'a li limilune'mu sa hilete enubuya'ani hinogo he'milabe.

9 Kele kele pana'i enali minete foya lite minelata nehana yamofihi lu epitogo kaba bo'aniuba ka'ani kehelinogo kele kele'i bati hite hi epelenogo kaba bo'animagi bu genogo laga'ani epesilibe. Kaba bo'animofihi baga'a liyafa hite enali ka'ani keye melilabe. 10 Ya nehite kaba bo'animofihi ana'ina gumina melise ana'ina'alo kaba hu bati hite foya li etete hilana yanauba fotogo hilube'mu hibe. Ya hilenogo Hu'mau bilata Bomofihi mono ka'a ya suhi ma suhi hite le'mo hofa telata nehabe.

11 Yana'mu luto Hu'mau silaga bona'i enubuto bilube luto ya suhi huto lehe'malata nohinamofihi ali huto hu'ehibe. 12 Ya higo ai lehe'molata nohinauba lemehati haya kolo'ehina lele'mo bebe solago ya'ma melugu fegutoga nasanalo libita hu'ehinana ya'ma he'mito ma melugu komopati lugufa kaba hu bati huto mino fotogo huto minoto mono bona'i lolo huto minalune'mu hune. 13 Ya nohuto Sipi Boti, Hu'mau lubuto bilata bo, to Yesu Kilisitou fana meha'a hiti huto hilina kana'amu geba hulata nohuta, yamofihi sekele mamu'a hiti nasanamo ni'inaya yana'mu fifa ilata nohune. 14 Ai ya'ma lali kumu yabe luto keke'i lu letoto foipana lito mino'ohuta yanaguti li he'mi letalibe luto minoto lito gulu gulu nehana bona'i lolo hilune luto ai'a yagapana'ago lele'mo eto hulenogo minoto hetofa hatofa nasanaloga mege'i amuya moloto minalune, luto keke'i lu letoto gufa'a he'mito fili'ehina yabe.

15 Kaga ya'ma lu nokumuna yamofihi lu enelepilata huto minobo. To bona'i enali kai kumu fa'mene bo nohibe lite li lalagi Hu'mau amuya'a hiti molo keto'ehina bo'amaka enegekesa lito sibina nehinogomo ka epekito enele'mo bebe soto hubo. To bati nehinogo kai bebe sose ka lu epito komopa'anigu enele'mo amuya molobo. To kai kumu kehelinogo notinogomo kebe meligino.